अमेरिकाको तल्लो सदन ‘हाउस अफ रिप्रेजेन्टेटिभ्स’ले राष्ट्रपति डोनाल्ड ट्रम्पलाई इरानविरुद्ध सैन्य आक्रमण गर्नबाट रोक्ने प्रस्ताव पारित गरेको छ।
बीबीसीका अनुसार उक्त प्रस्ताव २१५–२०८ मतले पारित भएको हो। चार रिपब्लिकन सांसदहरूले डेमोक्र्याटिक पार्टीको पक्षमा मतदान गरेपछि प्रस्ताव पारित हुन सम्भव भएको बताइएको छ।
युद्धविरुद्ध अमेरिकी संसदमा यस्तो स्पष्ट असहमति सार्वजनिक रूपमा देखिनु दुर्लभ मानिन्छ।
रिपोर्टअनुसार अमेरिकाले इजरायलसँग मिलेर फेब्रुअरी १८ मा इरानविरुद्ध सैन्य कारबाही सुरु गरेको थियो, जसपछि तनाव झनै बढेको हो।
यो प्रस्ताव राष्ट्रपति ट्रम्पको युद्ध शक्तिलाई सीमित गर्ने चौथो प्रयास भएको बताइएको छ। यद्यपि अब यो प्रस्ताव रिपब्लिकन नियन्त्रणमा रहेको अमेरिकी सिनेटबाट पनि पारित हुनुपर्नेछ।
तर सिनेटले अनुमोदन गरे पनि राष्ट्रपति ट्रम्पले भिटो प्रयोग गर्न सक्ने भएकाले इरानविरुद्ध सैन्य कारबाही पूर्ण रूपमा रोकिने सम्भावना अझै अनिश्चित रहेको विश्लेषण गरिएको छ।
भिटो उल्ट्याउन दुवै सदनमा दुईतिहाइ बहुमत आवश्यक पर्ने संवैधानिक व्यवस्था छ, जसका कारण यो प्रक्रिया अझै जटिल रहनेछ।
यसअघि पनि यस्तै प्रस्तावहरू अघि बढाइए पनि पूर्ण रूपमा सफल हुन नसकेको इतिहास रहेको छ।
(0)
टिप्पणी गर्न लगइन गर्नुहोस्