२०८३ साल जेठ २१ गते बिहीबार, अधिक जेठ कृष्ण पक्षको चतुर्थी तिथि परेको छ। आज सन् २०२६ जुन ४ तारिखका दिन विश्वभर निर्दोष बालबालिकामाथि हुने अत्याचार विरुद्धको अन्तर्राष्ट्रिय दिवस मनाइँदै छ भने नेपालमा जातीय भेदभाव तथा छुवाछुत उन्मूलन राष्ट्रिय दिवस पनि मनाइँदै छ।
हिन्दू धर्मशास्त्रअनुसार बिहीबार देवताका गुरु बृहस्पति तथा भगवान श्रीहरि विष्णुको पूजा–आराधना गर्ने विशेष दिन मानिन्छ। आजको दिन श्रद्धा र भक्तिपूर्वक व्रत बसेर पूजा गरे धन, विद्या, सन्तान सुख तथा पारिवारिक समृद्धि प्राप्त हुने धार्मिक विश्वास रहेको छ। साथै भगवान विष्णुकी अर्धांगिनी माता लक्ष्मीको पूजा गर्नाले घरमा सुख, शान्ति र ऐश्वर्यको वास हुने मान्यता छ।
पूजा गर्ने विधि
बिहान सबेरै उठी स्नान गरी शुद्ध भएर पहेँलो वस्त्र धारण गर्नुपर्छ। त्यसपछि पहेँलो फूल, चन्दन तथा प्रसाद तयार गरी भगवान विष्णुलाई अर्पण गर्दै पूजा–आराधना गर्नुपर्छ। पूजा सम्पन्न भएपछि परिवारको सुख, शान्ति तथा समृद्धिको कामना गर्दै प्रार्थना गर्न सकिन्छ।
धार्मिक मान्यताअनुसार व्रतको दिन ‘ॐ गुरवे नमः’ मन्त्र कम्तीमा पाँच माला जप गर्नुपर्छ। पहेँलो वस्तु दान गर्नु, बेसार, चना दाल वा पहेँलो फलफूल अर्पण गर्नु पनि शुभ मानिन्छ।
व्रतको महत्व
बिहीबारको व्रत सामान्यतया शुक्लपक्षको पहिलो बिहीबारबाट सुरु गरिन्छ। यो व्रत १३ महिनासम्म वा कम्तीमा ७ महिनासम्म निरन्तर गर्ने परम्परा रहेको छ। श्रद्धापूर्वक व्रत तथा पूजा गरे गुरु बृहस्पति र भगवान विष्णुको विशेष कृपा प्राप्त हुने तथा जीवनमा सकारात्मक ऊर्जा, आर्थिक उन्नति र पारिवारिक सुख प्राप्त हुने विश्वास गरिन्छ।
आजको दिन धर्म, सद्भाव र समानताको सन्देश फैलाउँदै पूजा–आराधनामा सहभागी हुन धार्मिक विद्वानहरूले आग्रह गरेका छन्।
(0)
टिप्पणी गर्न लगइन गर्नुहोस्