भारतीय जनता पार्टी (भाजपा) को निमन्त्रणामा पाँच दिने औपचारिक भ्रमणका लागि भारत पुगेका राष्ट्रिय स्वतन्त्र पार्टी (रास्वपा) का सभापति रवि लामिछानेले बुधबार भारतीय प्रधानमन्त्री नरेन्द्र मोदीसँग भेटवार्ता गरेका छन्। उक्त भेटपछि नेपाल–भारत सम्बन्ध र रास्वपाको बढ्दो राजनीतिक प्रभावबारे नयाँ बहस सुरु भएको छ।
भेटवार्तापछि प्रधानमन्त्री मोदीले सामाजिक सञ्जालमार्फत आफ्नो प्रतिक्रिया सार्वजनिक गर्दै लामिछानेसँगको भेटलाई सुखद र फलदायी भएको बताएका छन्। उनले नेपाल भारतको ‘नेबरहुड फर्स्ट’ नीतिअन्तर्गत प्राथमिक साझेदार मुलुक रहेको उल्लेख गर्दै नेपालको नयाँ सरकारसँग मिलेर द्विपक्षीय सम्बन्धलाई अझ सुदृढ बनाउने प्रतिबद्धता व्यक्त गरेका छन्।
मोदीले साझा समृद्धि, आपसी सहकार्य र क्षेत्रीय स्थायित्वका लागि दुवै देशले मिलेर काम गर्नुपर्ने आवश्यकता औंल्याएका छन्। उनले लामिछानेले व्यक्त गरेको सहकार्य र साझेदारीको भावनालाई आफूले स्वागत गरेको समेत बताएका छन्।
रास्वपा सभापति लामिछानेको भ्रमणलाई भारतले दिएको प्राथमिकताले राजनीतिक तथा कूटनीतिक वृत्तमा विशेष चासो पैदा गरेको छ। भ्रमणका क्रममा उनले प्रधानमन्त्री मोदीसँग मात्र होइन, भारतीय गृहमन्त्री अमित शाह, विदेशमन्त्री एस. जयशंकर तथा भारतीय जनता पार्टीका अन्य शीर्ष नेताहरूसँग पनि भेटवार्ता गरेका छन्।
परराष्ट्र मामिलाका जानकारहरूका अनुसार भारतले नेपालका परम्परागत राजनीतिक दलहरूसँग जस्तै नयाँ राजनीतिक शक्तिसँग पनि सम्बन्ध विस्तार गर्न खोजेको देखिन्छ। परराष्ट्र विज्ञ इन्द्रा अधिकारीका अनुसार नयाँ राजनीतिक शक्तिहरूसँग सम्बन्ध विकास गर्नु कुनै अस्वाभाविक विषय होइन। उनका अनुसार रास्वपा नेपालको राजनीतिमा उदाउँदो शक्तिका रूपमा स्थापित भएकाले भारतले पनि त्यसतर्फ ध्यान दिएको हुन सक्छ।
पूर्वराजदूत डा. लोकराज बरालले पनि भारतले नेपालको राजनीतिक यथार्थलाई बुझेर प्रभावशाली शक्तिहरूसँग सम्बन्ध विस्तार गर्ने प्रयास गरेको बताएका छन्। उनका अनुसार अन्तर्राष्ट्रिय सम्बन्धमा प्रभावशाली राजनीतिक शक्तिसँग संवाद बढाउनु स्वाभाविक प्रक्रिया हो।
यसैबीच, त्रिभुवन विश्वविद्यालयअन्तर्गतको नेपाल तथा एसियाली अध्ययन केन्द्रका कार्यकारी निर्देशक डा. मृगेन्द्र कार्कीले भारतले रास्वपालाई महत्त्व दिनु भनेको नेपालसँगको सम्बन्धलाई निरन्तरता दिन खोजेको संकेत भएको बताएका छन्। उनका अनुसार भारतले नेपालको राजनीतिक परिदृश्यमा देखा परेका नयाँ शक्तिहरूसँग पनि सम्बन्ध मजबुत बनाउन चाहेको देखिन्छ।
राजनीतिक विश्लेषकहरूका अनुसार छोटो समयमै राष्ट्रिय राजनीतिमा उल्लेखनीय प्रभाव जमाउन सफल रास्वपाप्रति भारतको चासो बढ्नु स्वाभाविक मानिन्छ। विगतमा भारतले नेपाली कांग्रेस, नेकपा एमाले र नेकपा माओवादी केन्द्रका शीर्ष नेतृत्वसँग निकट सम्बन्ध राख्दै आएको थियो। अहिले रास्वपाको बढ्दो प्रभावलाई मध्यनजर गर्दै भारतले नयाँ राजनीतिक नेतृत्वसँग पनि सम्बन्ध विस्तार गर्न खोजेको विश्लेषण गरिएको छ।
रवि लामिछानेको यो भ्रमण केवल औपचारिक भेटघाटमा सीमित नभई नेपाल–भारत सम्बन्धको आगामी दिशाबारे संकेत गर्ने महत्त्वपूर्ण घटनाक्रमका रूपमा हेरिएको छ। यसले दुई देशबीचको राजनीतिक, कूटनीतिक र आर्थिक सहकार्यलाई आगामी दिनमा नयाँ आयाम दिन सक्ने अपेक्षा गरिएको छ।
(0)
टिप्पणी गर्न लगइन गर्नुहोस्