ओलीको निर्देशन : जुनसुकै बेला आन्दोलन गर्नुपर्ने हुन सक्छ, तयारी अवस्थामा रहनू

नेकपा एमालेका अध्यक्ष केपी शर्मा ओलीले पार्टीका नेता तथा कार्यकर्तालाई सम्भावित आन्दोलनका लागि तयारी अवस्थामा रहन निर्देशन दिएका छन्।

मंगलबार काठमाडौंमा आयोजित अखिल नेपाल किसान महासङ्घ केन्द्रीय कमिटीको विस्तारित बैठकलाई सम्बोधन गर्दै ओलीले परिस्थितिअनुसार जुनसुकै बेला आन्दोलनमा उत्रिनुपर्ने अवस्था आउन सक्ने बताएका हुन्। आन्दोलनका लागि सधैँ लामो समय तयारी गर्न आवश्यक नपर्ने उल्लेख गर्दै उनले अवस्था असह्य बने तत्कालै आन्दोलन हुन सक्ने बताए।

ओलीले पछिल्लो समय आतंकपूर्ण वातावरण र विभिन्न गतिविधिका कारण पार्टी पछाडि धकेलिएको भए पनि यस्तो अवस्था सधैँ कायम नरहने दाबी गरे। नेता तथा कार्यकर्तालाई आत्मविश्वास र उच्च मनोबलका साथ अघि बढ्न आग्रह गर्दै उनले पार्टीलाई पुनः सशक्त बनाउने अभियानमा जुट्न निर्देशन दिए।

उनले चुनावमार्फत पार्टी निर्माण गर्न खोज्ने शक्तिहरूको सामना गर्दै एमाले आगामी निर्वाचनमा विजय हासिल गर्ने लक्ष्यसहित अघि बढ्ने बताए।

यसैबीच, ओलीले सर्वोच्च अदालतको कार्यशैलीप्रति पनि असन्तुष्टि जनाएका छन्। अन्य मुद्दामा हतारिएर फैसला गर्ने अदालतले प्रतिनिधिसभा विघटनसम्बन्धी मुद्दामा भने अहिलेसम्म निर्णय दिन नसकेको उनको टिप्पणी थियो।

समयमै न्याय प्राप्त नहुनु र ढिलो न्याय पाउनु उस्तै भएको धारणा राख्दै ओलीले अदालतबारे धेरै टिप्पणी गर्दा आफूमाथि मानहानिको मुद्दा लाग्न सक्ने भन्दै थप बोल्न चाहेनन्।

अध्यक्ष ओलीले प्रतिकूल परिस्थिति आए पनि एमाले पुनः उठ्ने, पुनर्गठन हुने र अघि बढ्ने दाबी गरे। आगामी दिनमा जनताको घरदैलोमा पुगेर किसान तथा सर्वसाधारणसँग संवाद गर्न र पार्टीलाई देशको निर्णायक राजनीतिक तथा लोकतान्त्रिक शक्तिका रूपमा स्थापित गर्न उनले नेता–कार्यकर्तालाई आह्वान गरे।

Is this conversation helpful so far?