काठमाडौं।। उदयपुरमा स्कुल बस दुर्घटना हुँदा एक जनाको मृत्यु भएको छ । शनिबार बिहान भएको उक्त दुर्घटनामा परेर ३० जना घाइते भएका छन् । महोत्तरीबाट सुनसरीतर्फ जाँदै गरेको दिप एजुकेसन बोर्डिङ स्कुलको स्टाफ बोकेको बा २ ख ६४३८ नम्बरको बस उदयपुर गढी गाउँपालिका–०७ जोगिटोलस्थित सडकमा दुर्घटना भएको हो ।

दुर्घटनामा महोत्तरीको बर्दिबास नगरपालिका बिमलेश दत्तको मृत्यु भएको छ । उनको उपचारका क्रममा बिहान ९ः५० बजे मृत्यु भएको जिल्ला प्रहरी कार्यालय उदयपुरले जनाएको छ ।दुई जना गम्भीर घाइतेको न्युरो अस्पताल विराटनगरमा उपचार भइरहेको छ भने २८ जना घाइतेको जिल्ला अस्पताल उदयपुरमा उपचार भइरहेको प्रहरीले जनाएको छ ।

बसमा सवार दुई जना भने सकुशल रहेको प्रहरीले जनाएको छ । बस आफैँ अनियन्त्रित भएर दुर्घटना भएको अनुमान प्रहरीले गरेको छ । घटनाका सम्बन्धमा थप अनुसन्धान भइरहेको जिल्ला प्रहरी कार्यालय उदयपुरले जनाएको छ ।