काठमाडौंको त्रिपुरेश्वरमा एक सार्वजनिक बसभित्रै आगो लगाएर आत्मदाह प्रयास गरेका २५ वर्षीय चालक दावा लामाको अवस्था चिन्ताजनक रहेको छ। प्रहरीले बसबाट निकालेर उद्धार गरेपछि उपचारका लागि कीर्तिपुरस्थित बर्न अस्पताल पुर्याइएका दावाको शरीरको ९० प्रतिशत भाग जलेको पाइएको छ। दावा ललितपुरको बागमती नगरपालिका–७ का निवासी हुन्। कीर्तिपुर बर्न अस्पतालका प्लास्टिक सर्जरी विभाग प्रमुख तथा सिनियर कन्सल्टेन्ट प्लास्टिक सर्जन डा. विशाल कार्कीका अनुसार चालक लामाको शरीरको ९० प्रतिशत भाग डढेकाले अवस्था गम्भीर छ।
बा.५ ख ४२७४ नम्बरको सार्वजनिक बसका चालक लामाले सोमबार त्रिपुरेश्वरमा आफूभित्रै रहेको अवस्थामा बसमा आगो लगाएका थिए। यात्रुविहीन बसभित्र आफूलाई थुनेर गरिएको यस आत्मदाह प्रयासका कारण उनी चिन्ताजनक अवस्थामा पुगेका हुन्। चालकले किन यस्तो कदम चाले भन्ने अझै खुलेको छैन। जानकारीअनुसार ट्राफिक प्रहरीसँग भएको विवादपछि आक्रोशित भई उनले यस्तो कदम चालेको हुनसक्ने अनुमान गरिए पनि प्रहरीले यसबारे ठोस धारणा दिएको छैन।
काठमाडौं जिल्ला प्रहरी परिसरका प्रमुख एसएसपी दिलीप घिमिरेका अनुसार घटनाबारे विस्तृत अनुसन्धान भइरहेको छ र वास्तविक कारण अनुसन्धानपछि मात्रै खुल्ने बताइएको छ। यसअघि त्रिपुरेश्वरमै पठाओ चालक गणेश नेपालीले पनि आत्मदाहको प्रयास गरेका थिए। यो पछिल्लो घटनाले नागरिक र राज्य संयन्त्रबीचको व्यवहार तथा गुनासो सम्बोधनको अवस्थामाथि समेत प्रश्न उठाएको छ। प्रहरीले घटनाको कारण, बसमा आगजनी गर्नुको परिस्थिति तथा ट्राफिक प्रहरीसँग भएको भनिएको विवादबारे अनुसन्धान अघि बढाएको जनाएको छ।
(0)
टिप्पणी गर्न लगइन गर्नुहोस्