बागमतीमा एमालेका ज्ञानबहादुर तामाङ दुई महिनादेखि विनाविभागीय मन्त्री
बागमती प्रदेशमा नेकपा (एमाले) का ज्ञानबहादुर तामाङ दुई महिनादेखि विनाविभागीय मन्त्रीका रूपमा रहेका छन्। मुख्यमन्त्री किरण थापा नेतृत्वको सरकार गठन हुँदा मन्त्री नियुक्त भएका उनले अझै मन्त्रालयको जिम्मेवारी पाउन सकेका छैनन्।
एमाले र नेपाली कम्युनिस्ट पार्टी (नेकपा) बीच मन्त्रालय बाँडफाँटमा सहमति नजुट्दा तामाङको जिम्मेवारी तोक्न ढिलाइ भएको बताइएको छ। नेकपाकी रमा आलेमगरले भने कृषि, पशुपन्छी, वन तथा वातावरण मन्त्रालयको जिम्मेवारी सम्हालिसकेकी छन्।
मुख्यमन्त्री थापाले केही दिनभित्र तामाङको जिम्मेवारी टुंग्याउने बताएका छन्। हाल कायम मन्त्रालयमध्येबाटै जिम्मेवारी दिइने उनको भनाइ छ।
यता, तामाङको विगतमा सहकारी संस्थाको अध्यक्षसमेत रहेको विषय पनि चर्चामा छ। उनी अध्यक्ष रहेको नेसनल नमोबुद्ध सहकारीका बचतकर्ताले २ करोड ३३ लाख ३९ हजार रुपैयाँ फिर्ताको माग गर्दै उजुरी दिएका थिए। बचतकर्ताको रकम फिर्ता गर्न पर्याप्त पुँजी नभेटिएपछि प्रदेश सरकारले २०८१ पुस २८ गते सहकारीलाई समस्याग्रस्त घोषणा गरेको थियो।
दुई महिनासम्म मन्त्रीको जिम्मेवारी नतोकिँदा बागमती प्रदेश सरकारको मन्त्रालय बाँडफाँट र प्रशासनिक व्यवस्थापनमाथि प्रश्न उठ्न थालेको छ।
(0)
टिप्पणी गर्न लगइन गर्नुहोस्