एजेन्सी – अमेरिकाबाट निष्कासित गरिएका ब्राजिलियन आप्रवासीहरूलाई विमानमा अपराधी जस्तै व्यवहार गरिएको छ । उनीहरू चढाइएको विमानमा न पानी थियो न त एसी नै चलेको थियो ।अधिकांश आप्रवासीहरूले विमानमा चार घण्टासम्म श्वासप्रश्वासको समस्यासँग जुध्नुपरेको थियो ।
आप्रवासीहरू ब्राजिल आइपुग्दा उनीहरूको हातमा हतकडी लगाइएको थियो । यस विषयमा ब्राजिल सरकारले ट्रम्प प्रशासनविरुद्ध असन्तुष्टि व्यक्त गरेको छ ।आप्रवासीहरूमाथिको व्यवहार मानव अधिकारको घोर उल्लङ्घन भएको ब्राजिलले बताएको छ । ब्राजिल सरकारले यस कार्यको लागि ट्रम्प प्रशासनबाट स्पष्टीकरण माग्ने बताइएको छ ।
शपथ लिएदेखि नै अमेरिकी राष्ट्रपति डोनाल्ड ट्रम्पले स्थायी कानुनी स्थिति विहीन लाखौँ आप्रवासीहरूलाई देश निकाला गर्ने उद्देश्यले श्रृंखलाबद्ध कार्यकारी आदेशहरू जारी गरेका छन् । त्यसबेलादेखि अमेरिकाभरबाट धमाधम अवैध आप्रवासीहरूलाई समात्ने र निष्कासन गर्ने प्रक्रिया चलिरहेको छ । यस कारबाहीको क्रममा, आप्रवासीहरू बोकेको एउटा विमान उत्तरी ब्राजिलको मानौस सहरमा अवतरण भएको थियो ।
अधिकारीहरूले ८८ जना ब्राजिलियन आप्रवासीहरूलाई विमानबाट ओर्लँदा हतकडी लगाइएको बताए । ब्राजिलका अधिकारीहरूले अमेरिकी अधिकारीहरूलाई हतकडी तुरुन्तै हटाउन आग्रह गरेका थिए । न्यायमन्त्री रिकार्डो लेवान्डोव्स्कीले यस विषयमा राष्ट्रपति लुइज इनासियो लुला दा सिल्भालाई जानकारी गराएको ब्राजिलको न्याय विभागले बताएको छ ।
आप्रवासीहरूलाई गरिएको अनादरपूर्ण व्यवहारबारे ब्राजिलले अमेरिकी सरकारबाट जवाफ माग्ने बताइएको छ । यसैबिच विमानमा सवार आप्रवासीहरूले उडानमा आफूलाई अपराधी जस्तै व्यवहार गरिएको बताए । विमानमा आफूहरूलाई पानी पिउन, शौचालय जान समेत नदिएको र हात खुट्टा बाँधिएको बताइएको छ । एसी नचलाइएकोले गर्मीका कारण केही मानिसहरू बेहोस भएको समेत भनिएको छ ।
COMMENT
.