कैलाली - कैलालीको मोहन्याल गाउँपालिका– ७ कुइनेमा बाघको आक्रमणबाट एक महिला घाइते भएकी छिन्। छाउगोठमा सुतिरहेको अवस्थामा ४० वर्षीया सरस्वती विकलाई बाघले आक्रमण गरेको थियो ।आइतबार राति करिब साढे १० बजेको समयमा सरस्वतीलाई बाघले आक्रमण गरेको मोहन्याल गाउँपालिकाका अध्यक्ष देवीदत्त उपाध्यायले जानकारी दिए ।
उनका अनुसार बाघको आक्रमणले उनको टाउको र मुखमा चोट लागेको छ । गाउँलेले होहल्ला गरेपछि बाघ भागेको उनको भनाइ छ ।सरस्वतीलाई उपचारका लागि लम्की लगिएको छ । उनको अवस्था भने खतरामुक्त रहेको बताइएको छ । कैलालीका विभिन्न क्षेत्रमा अझै छाउको समयमा गोठमा बस्ने चलन कायमै छ। छाउगोठमुक्त, वडा, पालिका घोषणा गरिए पनि गोठमा बस्ने चलन हटेको छैन। छाउगोठ हटाउने अभियान नै सञ्चालन गरे पनि यसको प्रभावकारी देखिएको छैन् ।
सुदूरपश्चिम र कर्णाली प्रदेश क्षेत्रमा महिनावारी भएका बेला छाउ गोठमा बस्नु र छाउ गोठमै निस्सासिएर, सर्पले टोकेर, जाडोले कठ्यांग्रिएर वा बिरामी भएर मृत्यु हुने कुरा नौलो होइन ।सरकारले केही समय अघि छाउगोठ भत्काउँने अभियान सञ्चालन गरेको थियो । तर छाउगोठ भत्काएपनि मान्छेको मानसिकता भत्काउँन नसक्दा हजारौं किशोरीहरुले पिडा भोगिरहेको छन् ।
१०, १२ वर्षअघिदेखि विभिन्न गैरसरकारी सङ्घसंस्थाले समुदायसँँगै समन्वय गरेर छाउगोठ भत्काए पनि कर्णाली र सुदूरपश्चिमका अधिकांश महिला तथा किशोरीले छाउ बस्न नछाडेको नेपाल प्रजनन् स्याहार केन्द्रको तथ्यांकले देखाएको छ ।
COMMENT
.