काठमाडाैं - अभद्र व्यवहारको कसुरमा पक्राउ परेकी अभियन्ता आशिका तामाङको हिरासत बसाई लम्बिएको छ । सोमबार काठमाडौं जिल्ला अदातलले उनलाई थप पाँच दिन हिरासतमा राखेर अनुसन्धान गर्न आदेश दिएको हो ।
पहिलोपटकको म्याद सोमबारसकिएको थियो । प्रहरीले सोमबारै उनलाई दोस्रोपटक म्याद थपका निम्ति जिल्ला प्रशासन कार्यालयमा पेस गरेको थियो । गत पुस २६ गते पशुपति क्षेत्र विकास कोषको पत्र जाहेरी र पुस २५ को प्रहरी प्रतिवेदनका आधारमा उनी गत मंगलबार पक्राउ परेकी थिईन् ।
गत पुस २५ गते तामाङ केही युवालाई लिएर पशुपति मन्दिरपरिसरमा पुगी पशुपति क्षेत्र विकास कोषका पदाधिकारी, कर्मचारी तथा सुरक्षार्थ खटिएका प्रहरीमाथि अपशब्द प्रयोग गरी अभद्र रूपमा प्रस्तुत भएकी थिईन् ।
यस विषयमा आशिकाले प्रहरी हिरासतबाटै माफि पनि मागि सकेकी छिन् । उनले हिरासतमा भेट्न पुगेका निकट व्यक्तिहरुलाई आफूले माफि मागि सकेको जानकारी दिएकी हुन् । बोल्दै जाँदा कहिले काही अलि बढि नै बोलेको आशिकाले प्रहरी समक्ष स्वीकार गरिसकेकी छन् ।
हिरासतमा हुँदा आफ्ना दुई छोराछोरीको अवस्था दयनीय हुँदै गएको आशिकाले भेट्न जानेहरुसँग भन्ने गरेकी छन् । प्रहरीले भने आशिकाविरुद्ध थप अनुसन्धान गरेर अदालतमा मुद्धा दर्ता गर्ने तयारी गरेको छ ।
COMMENT
.