काठमाडौं – धरान उपमहानगरपालिकाका मेयर हर्क साम्पाङ खाली गाग्री लिएर काठमाडौं आएका छन्। प्रधानमन्त्री केपी शर्मा ओली र खानेपानीमन्त्री प्रदीप यादवलाई भेट्न उनी काठमाडौं आएका हुन् ।
सरकारले धरानको खानेपानी समस्यालाई बेवास्ता गरेको भन्दै हर्क साम्पाङ खाली गाग्री लिएर प्रधानमन्त्री र खानेपानी मन्त्रीलाई भेट्न काठमाडौँ आएका छन् । सोमबार काठमाडौँ आएका उनी मंगलबार सिंहदरबार जाने छन् । उनले धरानका जनताका लागि खानेपानीको योजना नपरे आन्दोलन गर्ने चेतावनी समेत दिए ।
स्वतन्त्र रुपमा चुनाव लडेर मेयर बनेका साम्पाङले चुनाव जितेकै वर्ष कोकाह खोलाबाट धरानमा अस्थायी रुपमा खाने पानी पुर्याएका थिए । उनी मेयर हुनु भन्दा पहिले देखि नै धरानमा खानेपानी योजनाका लागि आन्दोलन गर्दै आइरहेका छन् ।चुनावमा पनि खानेपानीको मुद्धा प्राथमिकतामा राखेका हर्कले आफ्नो कार्यकालमा जसरी भएपनि खानेपानीको व्यवस्था गर्ने बाचा गरेका छन् । हर्कले प्रधानमन्त्री र खानेपानी मन्त्रीलाई खाली गाग्री देखाएर खानेपानी योजना माग्ने बताएका छन् ।
सरकारले जनतालाई खानेपानीको दीर्घकालीन व्यवस्था गर्न सक्नुपर्ने उनको माग छ । उनका समर्थकहरुले आइतबार नै खाली गाग्री लिएर धरानमा प्रदर्शन गरेका थिए । मंगलबार पनि काठमाडौंमा खाली गाग्रीसहित प्रदर्शन गर्ने तयारी भइरहेको बताइएको छ ।
COMMENT
.