काठमाडौं – राष्ट्रिय स्वतन्त्र पार्टीका सभापति रवि लामिछाने अब बुधबारसम्मलाई जिल्ला प्रहरी परिसर काठमाडौंको हिरासतमा रहने भएका छन् । लामिछानेको तर्फबाट थुनछेक बहस सकिए पनि जाहेरीवालाको तर्फवाट सुरू भएको बहस नसकिएपछि लामिछानेलाई न्यायाधीश माधवप्रसाद अधिकारीले हिरासतमै राख्ने गरी प्रहरीको जिम्मा लगाएका हुन् ।
सोमबार थुनछेक बहसका क्रममा रविले आफूलाई हिरासतमा नभई घर पठाइदिन आग्रह गरेका थिए । उनले आफू घर जान चाहेको बताए पनि आदेश नआउन्जेललाई हिरासतमै रहने गरी इजलासबाट आदेश भएको हो ।काठमाडौं जिल्ला अदालतका न्यायाधीश अधिकारीको एकल इजलासमा यो मुद्दामा बहस भइरहेको छ । आइतबार पनि अदालतमा पेस गर्ने गरी न्यायाधीशबाट प्रहरीको जिम्मा लगाउने आदेश भएको थियो । त्यसपछि रविलाई काठमाडौं प्रहरी परिसरको भीआईपी हिरासतमा लगिएको थियो।
सोमबार पनि उनी कार्यालय खुल्नेबित्तिकै अदालतल पुगेका थिए । तर, थुनछेक बहस नसकिएपछि उनलाई हिरासतमै बस्ने आदेश भएको हो ।अदालतले कास्की जिल्ला अदालतले झैँ धरौटी मागेमा रवि छुटने छन् । यदि पुर्पक्षका लागि अदालतले थुनामा पठाएमा रविको संकट बढ्ने छ ।पोखरास्थित सूर्यदर्शन सहकारी ठगी प्रकरणमा गत कात्तिक २ गते पक्राउ परेका लामिछाने ८४ दिनपछि गत बिहीबार साँझ ६५ लाख धरौटी बुझाएर छुटेका थिए ।
पोखराबाट छुटेपछि उनी आइतबार काठमाडौं जिल्ला अदालतमा हाजिर भए । कालिमाटीस्थित स्वर्णलक्ष्मी बहुउद्देश्यीय सहकारी संस्थामा भएको रकम अपचलनसम्बन्धी मुद्दामा लामिछाने प्रतिवादी बनाइएकोले काठमाडौंमा पनि बयान चलेको हो ।जिल्ला प्रहरी परिसर, काठमाडौंले गत पुस २१ गते लामिछानेसहित ३९ जनालाई प्रतिवादी बनाउँदै मुद्दा दर्ता गर्न सुझाव दिएको थियो।
COMMENT
.