काठमाडौं – सहकारी ठगी प्रकरणमा मुछिएपछि राष्ट्रिय स्वतन्त्र पार्टीका सभापति रवि लामिछानेको सांसद पद हाल निलम्बनको अवस्थामा छ । सम्पत्ति शुद्धीकरणसम्बन्धी मुद्दा जिल्ला अदालत कास्कीमा दर्ता भएसँगै गत पुस ८ गतेदेखि रवि सांसद पदबाट निलम्बनमा छन् ।
लामिछानेविरुद्ध सहकारी ठगी, संगठित अपराध र सम्पत्ति शुद्धीकरणसम्बन्धी अनुसन्धानका लागि मुद्दा दायर गरिएको पत्र कास्की प्रहरीले संसद् सचिवालयलाई पठाएपछि उनी दोस्रो पटक निलम्बनमा परेका थिए ।
त्यसबेला संसद् सचिवालयका महासचिव पद्म प्रसाद पाण्डेयले सूचना जारी गर्दै रविको सांसद पद निलम्बन भएको बताएका थिए । पूर्वगृहमन्त्री लामिछाने कास्की प्रहरीको हिरासतबाट ८४ दिनपछि बिहीबार रिहा भएका छन् ।
सहकारी ठगीसम्बन्धी मुद्दामा अदालतले ६५ लाख धरौटी लिएर रिहा गर्न आदेश दिएपछि बैंक ग्यारेन्टीमार्फत् बुझाएर लामिछाने हिरासतमुक्त भइसकेका छन् । तर उनको मुद्दा अझै कायमै छ । अदालतले शंकाको सुविधासहित उनलाई धरौटी बुझाएर रिहा गर्न भनेको हो । मुद्दाको किनारा नलागिसकेकाले रवि तत्काल संसद्मा फर्किन सक्ने सम्भावना छैन ।
जिल्ला अदालतबाट मुद्दाको अन्तिम किनारा लागेर आदेश नआइसकेकाले लामिछाने सांसद पदमा फर्किने अवस्था नभएको संसद् सचिवालयका प्रवक्ता एकराम गिरी बताउँछन् ।
COMMENT
.