काठमाडौं – नेकपा एमालेका अध्यक्ष केपी शर्मा ओलीले उपनिर्वाचन परिणामलाई लिएर नेकपा (माओवादी केन्द्र)ले भ्रामक सन्देश सम्प्रेषण गर्ने प्रयास गरिरहेको बताएका छन् । केन्द्रीय कमिटीको आठौँ बैठकमा प्रस्तुत राजनीतिक प्रतिवेदनमा अध्यक्ष ओलीले माओवादीले आफ्नो दल पहिलो भएको र लोकप्रिय मत ह्वात्तै बढेको भन्दै भ्रम फैलाएको आरोप लगाएका हुन् ।
‘माओवादी केन्द्रले ८ बाट बढाएर ११ स्थानमा विजय हासिल गरेको सत्य हो, तर हिजो ६ दलीय गठबन्धनका बेला आफूले उम्मेदवार नै नउठाएको र त्यसै कारण शून्य मत भएको ठाउँमा अहिले प्राप्त भएको मत जोड्दा मात्र उसको मत बढेको देखिएको हो,’ प्रतिवेदनमा भनिएको छ ।
मङ्सिर १६ गते स्थानीय तहमा रिक्त ४२ स्थान (थप दुई जिल्ला समन्वय समिति समेत)मा उपनिर्वाचन सम्पन्न भएको थियो । ७७ जिल्ला समन्वय समिति र ७५३ पालिकाका कुल ८, ४०३ जनप्रतिनिधिमध्ये ४४ पदमा भएको र कुल २,२६,७९९ मतदाता (१.२६ प्रतिशत)ले मतदान गरेको यस निर्वाचनले राजनीतिक शक्ति सन्तुलन र भविष्यको निर्वाचनको ठुलो पूर्वानुमान नगर्ने ओलीको ठहर छ ।
COMMENT
.