एजेन्सी – चीनमा कारोना जस्तै अर्को नयाँ भाइरस भेटिएको छ । कोरोना महामारी फैलिएको ५ वर्षपछि चीनमा फेरि अर्को नयाँ भाइरसको संक्रमण फैलिएको हो । नयाँ भाइरसको संक्रमण फैलिएका केही स्थानमा संकटकाल घोषणा समेत गरिएको छ । यसको लक्षण पनि कोरोना भाइरसजस्तै भएको बताइएको छ । यो नयाँ भाइरसको नाम ह्युमन मेटान्युमोभाइरस राखिएको छ । भाइरस संक्रमित भएका बिरामीमा चिसो र कोभिड–१९ को जस्तै लक्षण देखिने गरेको छ ।
यसको सबैभन्दा बढी असर साना बालबालिकामा देखिएको अधिकारीहरूले जनाएका छन् । चीनको रोग नियन्त्रण तथा रोकथाम केन्द्र (सीडीसी) यो भाइरस संक्रमित भएका बिरामीमा खोकी लाग्ने, ज्वरो आउने, नाक बन्द हुने र घाँटीमा समस्या देखिनेजस्ता लक्षण देखिने गरेका छन् । एचएमपीभीसँगै इन्फ्लुएन्जा ए, माइकोप्लाज्मा निमोनिया र कोभिड–१९ को बिरामी पनि देखिइरहेका छन् । यस्ता बिरामीको संख्या लगातार बढिरहेको स्वास्थ्य अधिकारीहरूको भनाइ छ ।
खोक्दा र हाच्छ्यु गर्दा भाइरस फैलिने खतरा बढी हुन्छ । भाइरसको असर बढी भएमा ब्रोंकाइटिस र निमोनिया पनि हुनसक्छ । रोयटर्सका अनुसार चीनले यो भाइरस नियन्त्रणका लागि नयाँ निगरानी प्रणालीको परीक्षण गरिरहेको छ । यो भाइरस सबै मौसममा जीवित रहनसक्छ । तर चिसो मौसममा फैलिने सम्भावना बढी रहन्छ ।
कोभिड–१९ को पहिलो संक्रमण सन् २०१९ मा चीनको वुहान शहरमा देखिएको थियो । जसलाई एक रहस्यमयी निमोनिया ठानिएको थियो । यो सार्स–कोभ–२ भाइरसबाट फैलिएको थियो । चीनमा पहिलो संक्रमण देखिएपछि विश्वभरी नै कोभिड संक्रमण फैलिदा लाखौं मानिसले ज्यान गुमाएका थिए । ३० जनवरी, २०२० मा विश्व स्वास्थ्य संगठनले विश्वव्यापी महामारी घोषणा गरेको थियो । संसारभर ७० करोडभन्दा बढीमा कोभिड संक्रमण भएको थियो भने ७० लाखभन्दा बढीको मृत्यु भएको थियो ।
COMMENT
.