काठमाडौं,। बञ्चरेडाँडा ल्याण्डफिल साइटका स्थानीयले फोहोर बोकेका गाडीहरू दुई दिनदेखि रोकेपछि सहरी विकास मन्त्रालयले बोलाएको छलफल सुरु हुने बित्तिकै तनावपूर्ण बनेको छ । बैठकमा काठमाडौं महानरपालिकाका मेयर बालेन शाह उपस्थित नभएपछि स्थानीयहरु आक्रोशित बनेका थिए । काठमाडौंको मेयर नै बैठकमा उपस्थित नभएपछि छलफलको कुनै औचित्य नभएको उनीहरुको तर्क थियो ।

उनीहरुले बालेन समस्याबाट भाग्न खोजेको आरोप लगाएका छन् । स्थानीय युवाहरूले मेयर बालेन शाहको अनुपस्थितिबारे प्रश्न गर्दै आफूहरू गोली खाएर मर्न तयार रहेको, तर फोहोरले रोग लागेर मर्न तयार नरहेको बताए ।  २०७९ जेठ २६ गते भएको १८ बुँदे सम्झौता कार्यान्वयन नभएको भन्दै स्थानीयहरूले काठमाडौं महानगरपालिकासहित उपत्यकाबाट फोहोर बोकेर गएका गाडीहरू रोकेका थिए । छलफलमा सहभागी स्थानीय जनप्रतिनिधि र अगुवाहरूले संघीय सरकार र काठमाडौं महानगरपालिकाले समस्यालाई बेवास्ता गरेको भन्दै चर्को विरोध जनाएका छन् ।नुवाकोटको ककनी गाउँपालिका अध्यक्ष सुमन तामाङले मन्त्रालयले छलफलका लागि बोलाएको जानकारी दिँदै प्रभावित क्षेत्रका स्थानीय सरकार प्रतिनिधिहरू र स्थानीय अगुवाहरूको सहभागितामा बैठक बसेको बताएका थिए ।

तर बैठक सुरु हुनासाथ स्थानीय प्रतिनिधि निराजन सञ्जेलले ‘अब हामी तपाईंहरूको कुरा सुन्ने अवस्थामा छैन । सहरी विकास मन्त्री आएर भिजिट गर्नुस्, त्यहाँका जनतालाई विश्वास दिन सक्नुहुन्छ रु मेयर बालेन भागेर हिँडेको छ । तपाईंहरूले खेलाँची नसम्झिनुहोस्’ भन्दै आक्रोशपूर्ण भनाइ राखेका थिए । उनले जनतालाई मुद्दा हालेर थुन्ने प्रयास गरेमा राज्यको गोली खाएर मर्न तयार रहेको समेत चेतावनी दिए । उनीहरूले मुख्य सचिव एकनारायण अर्याल, गृहमन्त्री ओमप्रकाश अर्याललाई समेत बञ्चरेडाँडाको समस्याबारे थाहा नभएको भन्दै प्रश्न गरेका थिए । युवाहरूले सामुदायिक वनको माटो झिकेर पुरेको र आफूहरूलाई दोस्रो दर्जाको नागरिक सम्झिएको भन्दै ‘इनफ इज इनफ’ भनेर आक्रोश व्यक्त गरे ।