काठमाडाैं - नेपाल प्रिमियर लिग (एनपीएल) सफलताका साथ सम्पन्न भएको छ । नेपाल क्रिकेट संघ क्यानले आयोजना गरेको एनपीएललाई दर्शकले दिएको अपार साथले नेपाली क्रिकेटको उचाई अझै बढेको छ ।
एनपीएलको चर्चा विश्वभर भइरहेको छ भने यसको ब्राण्ड भ्यालुपनि बढेको छ । करिब ८० करोडको कारोबार भएको मानिएको एनपीएलमा नेपाली खेलाडीहरुको प्रदर्शन औसत रह्यो । केही खेलाडीहरु जस्तै ललित राजबंशी, दिपेन्द्र सिंह ऐरि लगायताका खेलाडीले उत्कृष्ट प्रदर्शन गरिरँदा केही खेलाडीहरु भने प्रतियोगितामा फ्लप सावित भएका छन् ।
यसमा प्रमुख रुपमा पोखरा एभेन्जर्सका कप्तान रहेका कुशल भुर्तेल एनपीएलमा फ्लप नै रहे । कुशलले ७ खेलमा ६ इनिंगमा केवल ५४ रन बनाए भने ५ विकेट लिए । उनको एक खेलमा सर्बाधिक रन ३१ रहेको छ । राष्ट्रिय टिमका प्रमुख खेलाडी रहेका भुर्तेलको यो प्रदर्शन उनको क्षमताभन्दा निकै तलको रहेको छ ।
त्यस्तै यस एनपीएलमा औसतभन्दा तल प्रदर्शन गरेका अर्का खेलाडी हुन् विराटनगर किंग्सका कप्तान सन्दीप लामिछाने । सन्दीपले ७ खेलमा केवल ६ विकेट लिएका थिए भने ब्याटिंगतर्फ २२ रन बनाएका थिए । नेपालका स्टार स्पीनर रहेका सन्दीप एनपीएलमा फ्लप रहे, जसका कारण विराटनगर प्लेअफमा छनौट हुन असफल भएको थियो । त्यस्तै राष्ट्रिय टिमका अलराउण्डर गुलशन झाको प्रदर्शन पनि एनपीएलमा औसतभन्दा तल रह्यो ।
कर्णाली याक्सबाट एनपीएल खेलेका गुलशनले ९ खेलमा १३२ रन बनाए । जसमा एक खेलमा ४९ रन बनाएका थिए । त्यस्तै ९ खेलमा ४ खेलमा बलिङ गरेका गुलशनले केवल एक विकेट लिएका थिए । त्यस्तै लुम्बिनीबाट खेलेका सन्दीप जोरा, बिबेक यादव, काठमाडौँ गुर्खाजबाट खेलेका भीम सार्की, पोखराबाट खेलेका सागर ढकाल लगायतका खेलाडीको प्रदर्शन औसतभन्दा तल रहनु राष्टिय टिमको हिसाबले चिन्ताजनक देखिएको छ ।
COMMENT
.