काठमाडौं – गायिका समिक्षा अधिकारी डिपफेक भिडियोको शिकार भएकी छन् । डिपफेक टुलमार्फत बनाइएको समिक्षा अधिकारीको अत्यन्तै आपत्तिजनक भिडियो यति बेला सामाजिक सञ्जालमा भाइरल भइरहेको छ ।
भिडियो विभिन्न सामाजिक प्लेटफर्ममा भाइरल भएपछि समिक्षा साइबर ब्यूरोमा पुगेकी छन् । एआई प्रविधिको दुरुपयोग गरी आफ्नो चरित्रहत्या भएको भन्दै उनले साइबर ब्यूरोमा उजुरी दिएकी हुन् । ‘दिपु कान्छो’ नामक फेसबुक पेजबाट आपत्तिजनक भिडिओ पोस्ट गरिएका कारण आफूलाई मानसिक तनाव भएको उनले उल्लेख गरेकी छिन् ।
उजुरीमा शंकास्पद व्यक्तिको फेसबुक पेज विवरण, टिकटक आईडी, युट्युब लिंक, सम्पर्क नम्बर र अन्य प्रमाणसमेत समावेश गरिएको छ । प्रहरीलाई सम्बोध गर्दै उनले एआई र कम्प्युटरको दुरुपयोग गरी बनेका आपत्तिजनक भिडिओ पोस्ट गर्ने व्यक्तिलाई कारबाही गर्न माग गरेकी छन् । सामाजिक सञ्जालमा यस्ता गलत गतिविधिले आफूलाई मानसिक तनाव सिर्जना गरेको भन्दै उनले यसप्रकारका अपराध नियन्त्रण गर्न आग्रह गरेकी छिन् ।
उनले फेसबुकमा भनेकी छन्, “मेरो चरित्रहत्या गर्ने व्यक्ति विरुद्ध आज साइबर व्युरोमा निवेदन दिएकी छु । मेरो व्यक्तिगत र पारिवारिक जिवनमा असर पर्ने गरी राखिएको यस्तो प्रकारका भिडिओले समाज तथा राष्ट्रलाई नै असर पर्छ । साइबर व्युरोबाट कम्प्युटर र एआईको दुरुपयोग गरी यस्तो कार्य गर्ने व्यक्तिलाई तत्काल खोजी गरी कारवाही गर्ने जानकारी पाएको छु । कृपया सस्तो लोकप्रियता कमाउने उद्देश्यले कुनै पनि छोरी चेलीको जीवनलाई असर पर्ने गरी गैरकानुनी क्रियाकलाप नगरिदिनुहुन अनुरोध गर्दछु ।”
COMMENT
.