काठमाडौं – राष्ट्रिय स्वतन्त्र पार्टीका सभापति रवि लामिछानेले सहकारी संस्थाबाट ऋण लिएको प्रमाण पेश गर्न पत्नी निकिता पौडेलले चुनौती दिएकी छन् । अहिलेसम्म रविले सहकारीबाट ऋण लिएको प्रमाण नभेटिएको बताउँदै उनले विभिन्न सञ्चारमाध्यममा आएका समाचारहरूप्रति प्रश्न उठाएकी हुन्।
श्रीमान् कास्की प्रहरीको हिरासतमा रहेका बेला अनावश्यक प्रचार गरी सञ्चारमाध्यमले पुरुषार्थ देखाएको टिप्पणी पनि उनले गरेकी छन् । तर आफू अझै पनि रविले सहकारीबाट ऋण लिएको प्रमाण कुरेर बसिरहेको तर्क उनले गरेकी छन् ।
निकिता लेख्छिन्
आज विहानै बुवाले फोनमा हाँस्दै सोध्नु भयो, ‘तिमीसँग त त्यत्रो पैसा रहेछ, कुनै मिडियाले १५ करोड, कुनैले २५ त, कसैले ५० करोड। तिमीसँग छ चाहिँ कति ? अलिकति मलाई पनि देऊ न।’ मैले पनि हाँस्दै भने, ‘त्यत्रो पैसा भएरै त होला ४ करोडमा किनेको घरको किस्ता आजसम्म तिर्दै छु।’
बुवा–छोरीको कुराकानीको सन्दर्भ थियो, अनुसन्धानमा रहेको विषयमा भएको ‘मिडिया ट्रायल’ को। कुनै मिडियाले यति करोड, कुनैले उति करोड भनेर लेखेका छन्। मिडियाले धर्म नछोडेको भए बैंकिङ कारोवारको अंक सबैमा ठ्याक्कै एउटै हुनुपर्ने होइन र ? आफ्नो सम्पूर्ण बैकिङ विवरण प्रहरीलाई बुझिसकेकी छु। यस्तो संवेदनशील विषयमा किन यति संवेदनहीन भएका होलान् भनेर सोच्छु ! समाचार लेख्नेमाथि दया लागेर आउँछ।
खाता मेरो हो। यति(उति पैसा छ भनेर आआफैँ अनुमान लगाउनुभन्दा सोधेको भए बताइदिन्थेँ नि । श्रीमान् हिरासतमा भएको बेला ममाथि केही मिडियाले देखाएको ‘पुरुषार्थ’अगाडि समाज मुकदर्शक बनेकोमा झनै आश्चर्यमा छु। मेरो श्रीमानले सहकारीबाट ऋण लिएको प्रमाण छ भन्नेलाई प्रमाण मात्रै देऊ भनेको हो । अहिले पनि हामी त्यो प्रमाण कुरिरहेका छौँ ।
COMMENT
.