काठमाडौं।। पूर्वाधार विकास मन्त्री सुनिल लम्सालले तत्कालीन प्रधानमन्त्री केपी शर्मा ओलीले शिलान्यासका क्रममा स्थापित शिलालेख हराएकोबारे स्पष्टिकरण दिएका छन् ।
सोमबार काठमाडौंको नागढुंगामा नेपालकै आधुनिक सुरुङमार्गको उद्घाटन गर्दै उनले इतिहास र भूतलाई सधैं सम्मान गर्नुपर्ने पनि बताएका छन् ।
‘नागढुङ्गामा रहेको शिलालेख गायब पारिएको होइन। हामी फेरि पुनर्स्थापना गर्छौँ, हामीले भूतलाई एकदमै सम्मान गर्नुपर्छ । हामी भूतलाई एकदम इज्जत गर्छौँ,’ उनले भने, ‘यसअघि यसबारेमा केही-केही कुरा आएको थियो। शिल्यान्यासका क्रममा राखिएको शिलालेख सुरुङमार्गको पूर्वाधार बनाउने क्रममा झिकेर सडक विभागमा राखिएको रहेछ। त्यसलाई हामी फेरि पुनर्स्थापना गर्छौँ।’
उनले नागढुंगाबाट झिकेर बबरमहलस्थित सडक विभागको कार्यालयमा राखिएको शिलालेख गत भदौ २३ र २४ गते भएको जेन(जी आन्दोलनका क्रममा हराएको पनि बताए । ‘यहाँ थप पूर्वाधार बनाउँदा झिकेको शिलालेख सडक विभागमा आगजनी हुँदा हराएको रहेछ’, उनले भने, ‘त्यो बेलामा सुरू गरेको र अहिले उद्घाटन गरेको शिलालेख दुवैलाई हामी कायम गर्छौँ ।’
उनले नागढुंगा(सिस्ने खोला सुरूमार्गलाई नेपालकै आधुनिक भने । ‘अब हामीएकदमै धेरै सुरुङमार्ग हामी बनाउँछौँ । हाम्रो राष्ट्र टनेल युगमा जान तयार भएको छ’, उनले भने, ‘यसबाट देशले धेरै कुरा सिकेको छ। हामी धेरै टनेल अब बनाउन सक्छौँ ।’
करिब २९ अर्ब रुपैयाँ लगानीमा बनाइएको मुलुककै पहिलो व्यवस्थित यातायात सुरुङ मार्गको शिलान्यासको ७ वर्षपछि सोमबार उद्घाटन गरिएको हो ।
नेपालका लागि जापानी राजदूत मायदा तोरू र जाइका अध्यक्ष डा। तानाका अकिहिकोको उपस्थितिमा पूर्वाधार विकासमन्त्री सुनिल लम्सालले सुरुङको उद्घाटन गरेका हुन् ।
पहिलो चरणमा आपतकालीन प्रयोजनमा प्रयोग हुने सवारीले सुरुङ प्रयोग गर्न पाउँछन् । त्यसपछि चरणबद्ध ढंगले अन्य निजी र सार्वजनिक सवारीले सुरुङ मार्गको प्रयोग गरेर काठमाडौं आउन जान पाउने भएका छन्।
(0)
टिप्पणी गर्न लगइन गर्नुहोस्