चितवन।। हिमपहिरोमा परी निधन भएका कीर्तिमानी पर्वतारोही निर्मल पुर्जा ‘निम्स दाइ’को रामनगरस्थित घरका परिवार, छिमेकी र उनले अध्ययन गरेका विद्यालयका शिक्षक शोकमा परेका छन् । पाकिस्तानको ‘ब्रोड पिक’ हिमालमा गएको हिमपहिरोमा परी उनको निधनपछि भरतपुर महानगरपालिका(१ रामनगरस्थित परिवारका सदस्य, छिमेकी र अध्ययन गरेका स्मल हेभनका शिक्षक शोकमा परेका हुन् ।

सिङ्गो चितवन, देश र विश्वभरबाट शोक व्यक्त गरिरहेका बेला रामनगरस्थित माइलादाई बसिरहेका घरमा आज बिहानैदेखि छरछिमेक तथा आफन्तहरू श्रद्धाञ्जली दिन आइरहेका छन् । भाई गुमाउँदा पीडाबोध गरिरहेका दाजु जीतबहादुर पुर्जाले अरुबेला भाई हिमाल आरोहण गर्दा सधैँ आफूलाई भन्ने गरेको सुनाउँदै यसपटक पाकिस्तान जाँदा केही खबर नगरेको भन्दै उनि भक्कानिए। “पहिला हिमाल चढ्दा घरमा धुपबत्ती बाल्देउ है दाई भन्थ्यो । पाकिस्तान जाने बेलामा चाहिँ मलाइ केही नभनी गयो ।” घरमा आएकाहसरूँग उनले भक्कानिँदै पीडा पोखिरहेका थिए ।

निम्स दाईको निधनपछि रामनगरस्थित घरमा आज तस्बिरमा माल्यार्पण गर्नुका साथै दीपप्रज्ज्वलन गरेर उनिप्रति श्रद्धाञ्जली अर्पण गरिएको छिमेकी जीवनाथ पराजुलीले बताउए। उनले भने “हाम्रोभन्दा एक घर परको घरमा निम्सका माइलादाई बस्छन। त्यहाँ राखिएको तस्विरमा माल्यार्पण गरी श्रद्धाञ्जली अर्पण गरेका छौँ ।” उनको निधनले छिमेकीसमेत शोकमा परेका तारा कुँवरले बताए। बिहानैदेखि माइलादाईको घरमा श्रद्धाञ्जली दिन आउनेक्रम जारी रहेको उनले बताए ।

माइलादाई जीतबहादुर पुर्जा उनको घरमा बस्छन । म्याग्दीको अन्नपूर्ण गाउँपालिका(२ दानामा जन्मिएका उनले यहाँको आँपटारीस्थित स्मल हेभन स्कुलमा कक्षा ३ देखि १० सम्म पढेका थिए। सुरुमा आँपटारीमा रहेको स्कुल अहिले कल्याणपुरमा सरेको छ । कक्षा दशपछि उनि ब्रिटिस आर्मीका लागि गएका थिए ।

“म्याग्दीको दानाबाट बहिनी अनितासहित विसं २०५१ मा ११ वर्षको उमेरमा कक्षा ३ मा अध्ययन गर्न यहा आएका निम्सदाई सानैदेखि आवासमा बस्थे । हालको भरतपुर महानगरपालिका(१ रामनगरमा घर भए पनि निम्स र उनकी बहिनी आवासमा बस्थे, उनका खेलकुद शिक्षक सुरेन्द्र बरालले भने । करिब सात वर्ष निम्ससँग समय बिताएको स्मरण गर्दै उनि सानैदेखि साहासी र अनुशासित स्वभावको भएको बरालले बताए । उनको निधनले आफूलाई पीडाबोध भएको उनको भनाइ छ ।

स्मल हेभन स्कुलका छात्रावास प्रमुख शैलेन्द्र बरालले निम्स विद्यालयको अनुशासित विद्यार्थीका रूपमा रहेका बताए। उनले निम्सको निधनले सिङ्गो विद्यालय स्तबध भएको बताए । आठ वर्ष आफ्नै रेखदेखमा रहँदा निम्सको आँट देखेर ‘एकदिन महान व्यक्ति बन्छ’ भन्ने लागेको उनले स्मरण गरे ।

स्मल हेभन स्कुलका प्राचार्य रामचन्द्र न्यौपाने आफ्नो विद्यार्थीले विश्व कीर्तिमान कायम गरेर गिनिज बुकमा नाम लेखाउँदा निकै खुसी भएको स्मरण गर्दै अहिले निम्सको निधनले विद्यालय परिवार मर्माहत र स्तब्ध भएको बताए। सिङ्गो देश र विश्वले चिनेको आफ्नो विद्यार्थी गुमाउनुपर्दाको क्षण अपूरणीय रहेको भन्दै उनले यसले देशलाई अपूरणीय क्षति पुगेको बताए रासस।