काठमाडौं- पूर्वराष्ट्रपति विद्यादेवी भण्डारी सक्रिय राजनीतिमा फर्कने भगीरथ प्रयत्नमा छिन् । विगतमा एमाले सचिवालय बैठकमा बहुमत नपुगेका कारण भण्डारीको सदस्यता नवीकरण हुन पाएको थिएन । तर, सदस्यता नवीकरण गर्न नमान्ने नेताहरु अहिले भण्डारीको साथमा उभिएको संकेत देखिन थालेको छ । यससँगै राजनीतिमा फर्किछाड्ने विद्याको सपना अब चाहिँ सार्थक बन्ने आँकलन गर्न थालिएको छ ।

विद्याले एमालेको सक्रिय राजनीतिमा फर्केर ‘मदन भण्डारीको सपना पूरा गर्ने’ योजना अहिलेदेखि भने बनाएकी होइनन् । २०७९ फागुन २८ गते नौ वर्षे राष्ट्रपतिको कार्यकाल सकेपश्चात नै उनी विभिन्न गतिविधि गरेर सक्रिय हुने दाउमा थिइन् । कार्यकाल सकिएर कार्की ब्याङक्वेटमा देशभरका अगुवा महिला बटुलेर उनले पहिलो पटक आफ्नो शक्ति देखाएकी थिइन् । त्यसपछि उनी करिब एक वर्ष आफ्नो हैसियतको परीक्षण गर्न देश दौडाहामा लागिन् ।