ऐतिहासिक सफल फिल्म पूर्णबहादुरको सारङ्गी बाट चर्चामा आएको जोडी विजय बराल र अञ्जना बराइली पुनः अर्को फिल्ममा एकसाथ देखिने भएका छन्।
दुवै कलाकार अहिले नयाँ नेपाली फिल्म ‘सिन्दुरे जात्रा’को छायाङ्कनमा व्यस्त छन्। यस फिल्ममार्फत निर्देशक सरोज पौडेल ले लोकप्रिय जोडीलाई फेरि ठूलो पर्दामा प्रस्तुत गर्न लागेका हुन्।
निर्देशक पौडेल यसअघि ‘पूर्णबहादुरको सारङ्गी’ निर्देशन गरेर दर्शकबाट ठूलो प्रशंसा बटुल्न सफल भएका थिए। नयाँ फिल्ममा पनि उनले भावनात्मक कथा र सशक्त प्रस्तुति दिने अपेक्षा गरिएको छ।
‘सिन्दुरे जात्रा’को छायाङ्कन गत शुक्रबारदेखि पाल्पाबाट सुरु गरिएको हो। फिल्मको सम्पूर्ण छायाङ्कन करिब ३५ दिनभित्र सम्पन्न गर्ने योजना निर्माण टिमले बनाएको छ।
फिल्मको कथा तथा पटकथा पनि निर्देशक पौडेल स्वयंले तयार पारेका हुन्। निर्माण टिमका अनुसार फिल्ममा संस्कृति, सम्बन्ध र सामाजिक परिवेशलाई विशेष रूपमा प्रस्तुत गरिनेछ।
‘पूर्णबहादुरको सारङ्गी’पछि विजय र अञ्जनाको जोडीलाई दर्शकले निकै रुचाएका थिए। त्यसैले नयाँ फिल्म ‘सिन्दुरे जात्रा’लाई लिएर अहिलेबाटै दर्शकमाझ उत्साह बढ्न थालेको छ।
(0)
टिप्पणी गर्न लगइन गर्नुहोस्