रुकुम पश्चिममा ६ वर्षीय बालकको हत्या आरोपित पक्राउ
रुकुम पश्चिममा ६ वर्षीय बालकको हत्या भएको छ। बाँफिकोट गाउँपालिका–२ स्वारामा शुक्रबार साँझ घरनजिकैको बाटोमा खेलिरहेका बालकको ढुंगाले टाउकोमा प्रहार गर्दा मृत्यु भएको प्रहरीले जनाएको छ।
प्रहरीका अनुसार स्थानीय बलबहादुर नाथका ६ वर्षीय छोरा रमेश नाथमाथि सोही गाउँका ३३ वर्षीय भक्तबहादुर नाथले एक्कासि ढुंगा प्रहार गरेका थिए। टाउकोमा ढुंगाले लागेपछि बालकको नाक र मुखबाट रगत बगेको थियो। गम्भीर घाइते भएका बालकलाई तत्काल उपचारका लागि स्वास्थ्य चौकी पिपल लगिएको थियो।
स्वास्थ्य चौकीमा प्राथमिक उपचार गरेपछि थप उपचारका लागि बालकलाई जिल्ला अस्पताल पुर्याइएको थियो। तर, अस्पतालमा परीक्षण गर्ने क्रममा चिकित्सकले उनलाई मृत घोषणा गरेको जिल्ला प्रहरी कार्यालय रुकुम पश्चिमले जनाएको छ।
जिल्ला प्रहरी कार्यालय रुकुम पश्चिमका प्रहरी नायब उपरीक्षक (डीएसपी) वेदबहादुर पौडेलका अनुसार घटनामा संलग्न रहेको आरोपमा भक्तबहादुर नाथलाई प्रहरीले पक्राउ गरेको छ। घटनाबारे थप अनुसन्धान भइरहेको उनले जानकारी दिएका छन्।
प्रहरीका अनुसार पक्राउ परेका आरोपितको मानसिक अवस्था सामान्य नरहेको भन्ने जानकारी प्राप्त भएको छ। यद्यपि, उनको अवस्थाबारे आधिकारिक निष्कर्ष र घटनाको वास्तविक कारण अनुसन्धानबाट स्पष्ट हुन बाँकी छ।
घरनजिकै खेलिरहेका बालकको ज्यान जाने गरी भएको यस घटनाले स्थानीय क्षेत्रमा चिन्ता बढाएको छ। प्रहरीले घटनाको थप विवरण संकलन गर्दै अनुसन्धान अघि बढाएको जनाएको छ।
(0)
टिप्पणी गर्न लगइन गर्नुहोस्