मलेसियामा आजबाट सुरु भएको एसीसी महिला प्रिमियर कप क्रिकेट प्रतियोगितामा नेपालले विजयी सुरुवात गरेको छ। प्रतियोगिताको पहिलो खेलमा कतारलाई ८ विकेटले पराजित गर्दै नेपाली महिला टोलीले उत्कृष्ट प्रदर्शन गरेको हो।
मलेसियाको टुङ्कु जाफर क्रिकेट ओभलमा भएको खेलमा टस जितेर नेपालले पहिले बलिङ गर्ने निर्णय गरेको थियो। नेपाली बलरहरूले सुरुदेखि नै दबाब सिर्जना गर्दै कतारलाई १६ ओभर ५ बलमा मात्र ७६ रनमा अलआउट गरे।
कतारका लागि गेन्टेडु चन्डिरुले सर्वाधिक २५ रन बनाइन् भने कप्तान आयशाले १० रनको योगदान दिइन्। अन्य कुनै पनि ब्याटरले दोहोरो अंकमा रन जोड्न सकेनन्। नेपालको अनुशासित बलिङका कारण कतारी टोली ठूलो स्कोर बनाउन असफल रह्यो।
नेपालका लागि कप्तान रुविना क्षेत्रीले उत्कृष्ट बलिङ गर्दै ३ विकेट हात पारिन्। यस्तै पूजा महतो, रिया शर्मा र कविता कुँवरले समान एक–एक विकेट लिएर टोलीको जितमा महत्वपूर्ण योगदान पुर्याए।
७७ रनको सामान्य लक्ष्य पछ्याएको नेपालले आक्रामक सुरुवात गर्दै १० ओभर ५ बलमै दुई विकेट गुमाएर ७८ रन बनायो। नेपालको जितमा विन्दु रावलले सर्वाधिक ३३ रनको योगदान दिइन्। त्यस्तै पूजा महतो २८ रनमा अविजित रहँदै टोलीलाई सहज जित दिलाइन्।
बलिङ र ब्याटिङ दुवै विभागमा उत्कृष्ट प्रदर्शन गरेको नेपालले प्रतियोगितामा सकारात्मक सन्देश दिएको छ। पहिलो खेलमै प्रभावशाली जित निकालेसँगै नेपाली टोलीको मनोबल उच्च बनेको छ।
प्रतियोगिताअन्तर्गत नेपालले अब आफ्नो दोस्रो खेलमा भुटानको सामना गर्नेछ। नेपाल र भुटानबीचको खेल बिहीबार दिउँसो हुनेछ। त्यसपछि नेपालले समूह चरणको अन्तिम खेल शनिबार बिहान हङकङविरुद्ध खेल्ने तालिका रहेको छ।
पहिलो खेलमा प्राप्त प्रभावशाली जितले नेपाललाई प्रतियोगिताको आगामी यात्राका लागि थप आत्मविश्वास दिएको छ। नेपाली समर्थकहरूले पनि टोलीबाट यस्तै प्रदर्शनको अपेक्षा गरेका छन्।
(0)
टिप्पणी गर्न लगइन गर्नुहोस्