काठमाडौं: अमेरिका र इरानबिच जारी द्वन्द्व थप उत्कर्षमा पुगेको छ । अमेरिकी रक्षा मन्त्री पिट हेगसेथले इरानविरुद्ध लगाइएको नौसैनिक नाकाबन्दी अमेरिकाले ‘अनिश्चितकालसम्म’ जारी राख्न सक्ने बताएका छन् ।
यसैबिच अमेरिकी उपराष्ट्रपति जेडी भान्सले इरानसँगको द्वन्द्वमा वासिङ्टनका मुख्य उद्देश्यस्पष्ट पारेका छन् । भान्सका अनुसार अमेरिकी नागरिकका लागि ऊर्जाको मूल्य स्थिर राख्नु, तेहरानलाई आणविक हतियार प्राप्त गर्नबाट रोक्नु र यो द्वन्द्वबाट अमेरिकालाई थप बलियो स्थितिमा उभ्याउनु वासिङ्टनको प्रमुख लक्ष्य रहेको छ ।
उता इरानको सेनाले भने हर्मुज मार्गबाट समुद्री यातायात सामान्य रूपमा सञ्चालन भइरहेको अमेरिकी दाबीको खण्डन गरेको छ । इरानी सेनाले आफ्नो अनुमतिविना कुनै पनि जलपोत वा जहाज सो क्षेत्रबाट पार हुन नसक्ने दाबी दोहोर्याएको छ ।
यसैक्रममा, हर्मुज जलडमरू भएर यात्रा गरिरहेका ‘अबु धाबी नेसनल आयल कम्पनी’का दुई वटा जलपोतमाथि आक्रमण भएको छ । संयुक्त अरब इमिरेट्सको सरकारी सञ्चारमाध्यमका अनुसार आक्रमणबाट कुनै मानवीय क्षति भएको छैन भने स्थिति पूर्ण नियन्त्रणमा रहेको जनाइएको छ।
यस्तै, यमनका हुथी विद्रोहीले देशको पश्चिमी भागमा रहेको बाब अल(मन्देब जलडमलाई लक्षित गरी दुई वटा मिसाइल प्रहार गरेका छन् । हुथी सम्बद्ध ‘सबा’ समाचार एजेन्सीका अनुसार रणनीतिक रूपमा महत्त्वपूर्ण मानिने उक्त समुद्री मार्गमा तनाव बढाउने उद्देश्यले आक्रमण गरिएको हो । खाडी क्षेत्रमा चुलिँदो तनावका कारण विश्वव्यापी ऊर्जा आपूर्ति र समुद्री व्यापार जोखिममा पर्ने चिन्ता बढेको छ ।
(0)
टिप्पणी गर्न लगइन गर्नुहोस्